Syekh Yusuf Abul Mahasin Tajul Khalwati Al-Makasari Al-Bantani ( Part 1 )

Tuanta Syekh Yusuf AlMakassari Al-Taj Al-Khalwaty

Pau-pauwanna Manggena Tuanta Syekch Yusuf AlMakassari

Na ia Uru Kaniakkanna 

Niak sekre Wattu, Dampang Kokmarak nammepo ri ballak-ballak kokonna ri lantang bangngia naniak, singarak nacinik ri tangngana kokonna na mangemo na ciniki, battui mange maknassa niakmo tau toa ammenteng ri dallekanna angsingarri. Nakalimba ang mo I Dampang Kokmarak angciniki anjo tau toaya. Tena nasallo pakrammi na ciniki anjo singarakna tau toaya, nakmaknassa tommo rupanna nicinik ri dampang kokmarak. 

Nakanamo tau toaya “ O dampang Kokmarak, Kamaseang laloa, nasabak eroka ammantang ri kau, poroniak nu agaang anjama-jama ri kokoa”, nana kanamo Dampang Komarak “ O tau toa, lakkutaknanga ri katte, tu battu kereki mae pakrasanganta, apatodong lanri naniakki battu mae anrinni ri empoangku, nanakanamo tau Toaya “ manna inakke taku asseng tongi kabattuangku, nakuniak mamo anrinni ri kau,  Apaji nanakanamo Dampang Kokmarak, “ Ammantang maki pale anrinni, ka erokka mange rolo ri ballak, barekulle naki jagaianga rolo lamung-lamunga. Nammantangmo tau toaya, anjagai kokoa. 

Assulukmi Dampang Kokmarak ri ballakna, na ribokoanna niak mo sekrek allo nana kanamo Dampang Kokmarak ri Tau toaya, “ Umbe naungki ri Moncong Loe Annatak Nipa “, nakanamo Tau Toaya, “ Bajikmi “, nak maklampami naung mange ri Moncong Loe. Battu naung, mange mi ri ballakna Gallarang Moncong Loe. Sallo-salloi mangemi annataknipa, lekbaki silolongami Nipana na erangmi naik ri Kokmarak. 

Pirang allo arei battu rawana, nakanamo Tau Toaya ri Dampang Kokmarak, “Iyaminne Ku pauangki, erok dudua tonga  naung ammantang ri daengku Gallarang Moncong Loe “. Nakana mo Dampang Kokmarak “ Bajikmi punna erokki mange ammantang ri sampo sikalingku,”. Lekbaki Naungmi Tau Toaya, battue naung  nakana mo Gallarang Moncong Loe “rannu dudua antu lanri eroknu ammantang ri nakke,”. Apaji Nammantangmo ri Gallarang Moncong Loe, ampaka tunai kalenna  ri passuruanna tu napammantangia.

Manggalle tongi Jeknek, mangngalle tongi Kayu, Akdengka tongi Ase,  taena pattujuang ia ngaseng pole ri kamponga pakrasanganga napattujuang ngaseng. Namammuji ngaseng mo Taua angkana “ angngapai naniak Tau Toa kamma anjo”. 

Na ia gannaknamo sibulang, ruang bulang, appalak kanami ri Gallarrang Moncong Loe, angakanai “erokma appalak kana ri katte, ammoterek naik ri daengku Dampang Kokmarak”,  Ammoterek mi naik ri Kokmarak, Battui naik nakanamo Dampang Kokmarak ”niak Maki”, nakanamo Tau Toaya “iyo niakma”. Lekbak kamma anjo narapiki bangngi nakana mo tau Toaya, “nia erok ku pau ri katte”, nakanamo Dampang Kokmarak,  “Apa erok nipau ?” nakanamo tau Toaya “niak Illa takkassimbanganna nyawaku ri anakna daengku Gallarang Moncong Loe, maka erokji kutaeng ri tau kamma  I nakke”, nakanamo Dampang KokMarak  “antearei kamma nanromi kamma nipasicinakangpi sallang”.  

Lekbaki naungmi Dampang Kokmarak, battue naung nakanamo Gallarang Monconeg loe, “apa nubattui nuniak naung mae?”, battue naung nakanamo Gallarang, “Apa nu batui nu niak naung mae? “, nakana mo Dampang Kokmaraka, “iyaminne  kubattui naung mae ri kau andik, anjo tau toa lekbaka ammantang ri kau, niak kananna ri nakke, Niak illa Takkassimbanganna Nyawana ri julu anaka, Erok jako Anjo?”.

Nakanamo Gallarang Moncong Loe, “Bajikmi ia memang tommi tau kammaya ku minasai tau kammase-mase kammaya, ala siapa-siapami jaina angngonjoki tukakkku na taena napammiai nawa-nawangku, passangngalinna ia pa antu Tau Toaya, teami angkanai nakke na pasau bukungku, ka manna pole bija pammanakkanta  ri pakrasanganga napangngaleang ngaseng Jeknek, Kayu, naniak todong polo gaukna kucinik marakmaraeng, kammai kucinik tu tallantea bangkenna ri buttayya punna makjappa. Apaji anne inakkae ri Pakmaikku lanri erokna Allahu Ta Alah, siagang Barakkakna Nakbiya Sallalluhu Alaihi Wasallam.

Pakbuntinganna Manggena Tuanta  siagaang Anakna Gallarang Moncong Loe 

 Napauang ngasengmi Bija Pammanakkanna, rannu ngasengmi apaji nani parurumo di pakbunting. Dampang Kokmarak amparurui tau toaya. Na ribokoanna tanisuro kanami gaukna nanikanaya buntingberu, nasaba na asseng ngaseng ji taua adakna nikanaya bunting beru. Kammami anjo passabakkanna nananromo Tu Salamaka Ri Lino siagaang Ri Akhera ri Buttaya ri Gowa.  

 Naribokoanna ni surukanaiseng pau-pauanna Karaenga Ri Gowa. 

Niak sekre wattu nammempomo Karaenga si kusiangngi ri sikamma Tu Gowaya nanagappa na Ukrangi Gallarang Moncong Loe, nanakan “Angngapa are I kutaek Gallarang Moncong Loe, natena niakka battu akkusiang, apa are nagaukang ?”, lekbaki nakanamo Karaenga ri pakalaweng epuka, “Aklampa saiko anraik anciniki Gallarang moncong Loe”. Na lampamo pakalaweng epuka anraik, battui anraik narapikangmi anjo Tau Toaya attontong siagang bainenna. 

Na iya nacinikna bak lalo karampasangi anjo pakalaweng epuka anciniki lanri bajik-bajikna rua sikalabini, nakanmo Tau Toaya ri Bainenna, “mangeko linta basai jeknek cappak uyukna, nanu palekbesiang anjo pakalaweng epuka”. Nanaungmo ambalekbesiangi ambangungmi naik pakalaweng epuka, natulusuk lampana kalauk ri Gowa. 

Battui kalauk tuluksuk mi mange ri dallekanna Karaenga annyomba angakanai “ki bunoa, ki tallassia Karaeng, accinika Tau bajik-bajik dudu tappakna”. Nakana mo Kareanga “inai mi Tau nucinik”, nakana mo pakalaweng epuka “sombangku, anakna Gallarang Moncong Loe iyaka akburaknemi, iyaminjo passabakkenna na tena battu akkusiang lanri appakbuntinna”. 

Nakana mo Kareang Bainea “O Karaenga ri Gowa, “mangeko suro allei eroka anciniki”, na suromi Karaenga anraik, battumi anraik suroa nakanamo “Nakellaiki kalauk Karaenga”, nakanamo Buraknenna “apparuruko naki kalauk ri Karaenga”. Apaji napparurumo rua sikalibini. 

Lekbaki apparuru aklampami kalau ni erang ri Suroa, battui Kalauk tulusukmi antama ri tambung-tambunga, na anjo karaenga ammentemmi naik rua sikalabini attontong anciniki antamak mae. Nakanamo Karaeng Bainea “O karaenga ri Gowa, kukellaiki ambaineangi”, nakanamo Karaenga “tamakkuleami taua ni baineang tau niaka buraknenna”, nakanamo Kareang bainea “erokja akmaru punna tau kamma anjo”, nakanamo Karaenga “Rio lo ji kimakkulle appakamma ri wattu kaperetta, tamantamata Isilang sanggenna mo antama Isilang tamakkuleami nigaukang kammaya”.

 Nakanamo Karaeng Bainea “iyajintu nu karaeng”. 

Taenamo nakkana Karaenga, battui mange ri bangkenna sapanaya, tulusuk mi naik ri dallekanna Karaenga akkusiang nakana mo Karaenga “bajik-bajiki bainennu Tau Toa ?, nakanamo tau Toaya “Sombangku bajik-bajiki ia”, lekbaki nisaremi kanre, lembaki angnganre nakanmoseng karaenga “bajik-bajiki bainennu Tau Toa ?, nakanamo tau Toaya “Sombangku bajik-bajiki ia”. 

Sallo-sallo ammentengmi ammempo ri dallekanna karaenga akkusiang, akdalle mangemi ri bainenna akkana cakdi-cakdi ri bainenna, “erokma nakke appalak kana, ammantang mako ikau”, na langngereki kananna buraknenna angngarrukmi bainenna. Nanakanamo Buraknenna “teako simpungi, teako pakrisi pakmaiknu lanri erokna Allah Ta Alah sicinik jaki sallang”. 

Lekbaki akdallek mangemi ri karaenga, nanakana “sombangku, appalak kanami ataya”. Nakanamo Karaenga “Bainennu ia ?, nakanamo Tau Toaya “Sombangku ammanatmi iya, ka ni puji I ri karaenga”, nakanamo Karaeanga “erangi anjo bainennu”, nakanamo tau toaya “Sombangku Teai Ada’ kammaya punna na puji karaenga na tanni sareangnga”. 

Na lampamo naung ri sapanaya, lanri kammanami anjo na battue mi bata-bata pakmaikna Kareanga. Nakana mo karaenga “Pinawang sai anjo, ciniki teai anjo tau Toa bawang-bawang, iaminjo Nakbi Khillerek (Khidir) A.S ampaklaekherki kalenna. 

Apaji nani pinawangmo sanggenna timungang lompoa nataenamo nicinik assuluk. Kammami anjo pau-pauwanna Tu mangnganakkanna Tuanta Salamaka.

Sumber:

~Sinrilik Tuanta Salamaka

~Channel Cadas Official.